Suspek sa pagholdap sa bangko
sa Iloilo nadakpan sa Roxas!

Ni FELIPE V. CELINO

Syudad sang ROXAS - Isa ka suspek sa nagluntad nga pagpangholdap sa East-West Bank sa Syudad sang Iloilo sang Enero 3 sini nga tuig ang gindakop sang mga kapulisan kahapon sang hapon sa diri.

Gindakop ang suspek nga si Christopher Dote alyas Yoyoy, 27 anyos kag residente sang Brgy. Libo-o Dingle, Iloilo mga takna Alas-dos sang hapon sa Brgy. Loctugan, diri.

Nahibaloan nga may pending warrant of arrest na nga daan sa kaso nga robbery with homicide ang suspek nga ginpapanaog ni Regional Trial Court(RTC) Judge Florian Gregory Abalajon sang Branch 33 sa Syudad sang Iloilo nga ginpetsahan Nov. 15, 2010.

Gin-aresto si Dote matapos nga isa ka 16-anyos nga dalagita gikan sa banwa sang Panay, Capiz ang nagreklamo sa kapulisan nga ini sia ang ginhimuslan sang suspek sang nagligad nga bulan. Residente sang banwa sang Panay ang iloy sang suspek.

Nangayo sang bulig sa kapulisan ang biktima agud madakop ang

 


suspek.

Ang gintingob nga pwersa sang Criminal Investigation and Detection Group (CIDG) kag sang Philippine National Police (PNP) Highway Patrol Group ang nagpatigayon sang surveillance batok sa suspek. Nahuman ang plano sa pagpanguna ni SPO4 Bito delos Santos, CIDG deputy provincial director.

Suno kay Delos Santos, gin-text sang dalagita ang suspek nga agud makigkita bangod nagakinanglan ini sang kwarta.

Gina-alegar nga ang suspek ang involved man sa pagpatay sa isa ka pulis sa Lapaz, Iloilo sang nagligad nga tuig, pagpatay sa bise-alkalde sang Negros Occidental, kag pagholdap sa negosyante sa President Roxas, Capiz kon sa diin P3.2 milyon ang nakuha.

Suspek man si Dote sa pila ka mga nagluluntad nga holdapanay kag kinawatay sa probinsia sang Iloilo kag Capiz, siling pa ni delos Santos.

Sa karon, ang suspek ang yara na sa paghinakop sang CIDG sa Syudad sang Iloilo kag natalana nga iga-presentar sa korte.

Samtang, ginpanginwala ni Dote ang kahilabtanan sini sa nagluntad nga holdap sa East West Bank sa Syudad sang Iloilo. Apang gin-ako sini nga kilala ya ang mga suspek lakip na sa nagpatay sa pulis, sa President Roxas robbery kag pagpatay sa bise alkalde sang Negors nga nagluntad sa atubang sang simbahan sang Jaro.

Nagpamalibab naman ang kapulisan sa paghingalan sa iban nga mga suspek nga ginmensyonar ni Dote bangod sang security reason./H



(Disclamer)
Bene Nota: The views and opinions expressed here by the author are personal to him, and do not reflect the views and opinions of the website owners and administrators. Any issue or complaint about the article must be addressed solely to the author, who is solely responsible for the article.