Lalaki patay sa indian target!

Ni FELIPE CELINO

Syudad sang ROXAS – Patay ang 25-anyos nga traysikol drayber sang naigo ini sang ‘Indian target’ kahapon sang aga sa Premier de Mayo street diri.

Ginkilala sang kapulisan ang biktima kay Michael John Sueta, residente sang Pavia street, Barangay 9 diri.

Suno sa imbestigasyon sang kapulisan, nagalakat ang biktima kaupod ang mga abyan sini sa bahin sang Bayot Drive sang ginsugata sila sang grupo sang mga kalalakihan.

Suno naman sa asawa sang biktima nga si Marlyn Sueta, gin-updan lamang sang biktima ang mga abyan sini sini pakadto sa Brgy. Punta Tabuc, isa ka kilometro ang kalayuon gikan sa duog sang krimen. Gindugang pa sang asawa nga amo na lamang ang iya kakibot sang ginpahibalo sia nga patay na ang iya bana.

Suno pa gid kay Marlyn nga wala man sang kontra ang iya bana.

Sandig dugang sa report sang kapulisan, naga-angot pa sa leog sang biktima ang Indian target sang gindeklarar ini nga patay na sang attending physician nga si Dr. Florencio Luching, sa Saint Anthony College Hospital.

Samtang ginasulat ini nga balita, may natumod na nga suspek nga ginkilala lamang kay Feliz nga padayon subong nga gina-ayam sang kapulisan./H