Mac Cabreros

Mar 29, 2011

Dev’t plan ng Ph, inilatag

Inihayag ni Socioeconomic Planning Secretary Cayetano W. Paderanga Jr., na aprubado ng National Economic and Development Authority (NEDA) Board ang Philippine Development Plan (PDP) para sa taon 2011-2016.

Sa media briefing, inilahad ni Sec. Paderanga, na siya ring Director general ng National Economic and Development Authority (NEDA), na nakatuon ang pagkamit sa target ng administrasyon ni Pangulong Benigno Aquino III sa good governance at anti-corruption na naglalayong mapababa ang kahirapan sa pamamagitan ng pagkakaroon ng trabaho ng ating kababayan.

"Inclusive growth, not the trickle-down and jobless growth that we had in the past years, is the primary aim of the Plan," pahayag ni Sec. Paderanga.

Binigyan-diin ni Sec. Paderanga na para matupad ang plano, ipupursige ng gobyerno ang paghimok ng investors sa pamamagitan ng public-private partnership upang makapagpatayo ng iba’t ibang negosyo at imprastraktura na magbibigay ng trabaho ng ating kababayan.

"To achieve inclusive growth, the country needs to achieve a high and sustained growth path, provide equal access to development opportunities across social spectrums, and implement responsive social safety nets that would assist those who are left behind by the character of growth," pahayag pa ni Sec. Paderanga.

Binanggit ni Paderanga na ang pagkamit sa PDP, na aayudahan ng maayos at transparent na pamamahala at malakas na paglaban sa korupsyon gayundin ang malakas na pangongolekta ng buwis, ay alinsunod sa pagkamit sa millennium development goals o MDGs ng bansa.

Kasabay nito, ipinahiwatig ni Paderanga ang posibilidad na pagrebisa sa economic growth target ngayong taon na 7 hanggang 8 porsyento dahil sa krisis sa Middle East at North Africa (MENA) region at kalamidad sa Japan, kung saan malaki ang epekto nito sa kalakalan at magdudulot ito ng pagtaas ng inflation sa bansa. Mac Cabreros