Mac Cabreros

Pebrero 26, 2011

HEI sa UK, bukas sa Pinoy

          Matapos buksan ng European Union ang pinto para makapag-masteral at doctorate, binuksan naman ng may labingwalong higher education institution o HEI sa United Kingdom ang pagkakataon na makapag-aral dito ang mga Pinoy.

          Inaanyayahan ng British Council of the Philippines ang mga Pinoy na dumalo sa UK Education exhibition sa Ruby ballroom ng Crowne Plaza Hotel, Ortigas Center ngayong Marso 4 at 5 mula ala-una hanggang alas-singko ng hapon.

          “Dito malalaman kung paano makapag-aral ang ating kababayan sa mga kilalang kolehiyo at unibersidad sa United Kingdom,” pahayag ni Alec Ladanga, programme and partnership development manager (Education) ng British Council.

          “Ito ang pagkakataon ng iba nating kababayan na mahanay sa mga kilalang personalidad na nakapag-aral at nakapagtapos sa United Kingdom,” dugtong naman ni Ms. Lynn Ayers-Plata, press, visits and events officer ng British Embassy at binanggit na kabilang sa mga nakapagtapos sa UK sina dating UP president Francisco Nemenzo, dating AIM president Roberto de Ocampo, Attorneys Katrina Legarda, Harry Roque at Danny Concepcion gayundin sina Monique Wilson at Lesley Mobo na senior designer ngayon ni Harrods. Mac Cabreros