Mac Cabreros

Mar 10, 2011

15,000 pamilya, mabiyayaan ng Share Your Extras

          Libu-libong pamilya ang mabibiyayaan ng Share Your Extras project ng SM Foundation, Department of Social Welfare and Development at Caritas Manila.

          Batay sa impormasyong nakalap ng Balita, nakatakdang dadalhin at ipapamahagi sa ating kababayang saklaw ng Pantawid Pamilya program, mga biktima ng kalamidad at mga katutubo sa Laguna, Cavite, Bulacan, Pampanga, Batangas, Tarlac, Quezon, Bicol, Cebu, Davao, Saranggani, Iloilo, Misamis Oriental, Negros Occidental at mga piling lugar sa Mega Manila.

          “Ang Share Your Extras ay magsisilbing tulay para makarating sa mga mahihirap ang mga labis at naka-imbak na pagkain, damit, gamit pampaaralan, kasangkapang pangtahanan at kaunting salapi naitatabi para sa kawanggawa,” pabatid ng organizer.

          Ang donasyon ay maaring ilagak sa mga  Share Your Extras booth sa 40 Supermalls sa buong bansa. At para sa karagdagang detalye ay tumawag sa 0917-511982, 831-8282 at 831-8000 local 1485. Mac Cabreros