KILATIS
Panday Lipunan

PANGO AT PINOCCIO,
IPAGBAWAL SA OMBUDSMAN

KUSANG-PALO na mag-imbestiga at umaksiyon kung may mag reklamo at magsampa ng kaukulang kaso, sa anumang ginawa o kinaligtaang gawin ng isang opisyal ng pamahalaan o empleayado, tanggapan o ahensya, kung ang ginawa o ang kinaligtaang gawin ay lumalabas na labag sa batas, hindi makatarungang, hindi kanaisnais o walang pakinabang.

PAGSA-PUBLIKO ng mga nilalaman ng imbestigasyon kung kinakailangan ng may kaukulang pag-iingat o pagsaalang-alang sa kapakanan ng mga akusado.
Ito kapwa Pinoy, sa “bao-ng-niyog (in a nutshell)” ang mga pangunahin at pinakamahalagang tungkulin ng Office of the Ombudsman, na kung natutugunan lamang, ang MABUTING PAMAMAHALA ay tiyak na makakamtan at hindi na magkakalitse-litse ang buhay ng sambayanan.

Nga lang, ang tungkuling ito ay kaya lamang gawin ng Ombudsman na hindi KASABWAT o TUTA ng mga gumagawa ng KAUNGASAN.

Huwag ninyong minamaliit ang PNP. Mayrun din kaming PPP. Pakilala, Paalala, at Paalam, ani, Sen. Lacson. Nga lang, kagyat siyang kinorek ng kanyang comptroller noon na ngayon ay kongresista na rin, Rep. Romeo Acop ng Antipolo City, na ang naturang pondo ay 44 at hindi 40 milyon lamang. May credit card pa na tila “sky is the limit.” May pang gaso din na kahit 50 sasakyang pa na tumatakbo man 24 oras ay hindi kayang lagukin. HINDI ITO NAAMOY NG MGA TAGA-OMBUDSMAN? Pango nga eh!?

Buwan ng Enero 2009, dawit sa World Bank report ang asawa ni PGMA sa "bid fixing," sa DPWH. Inilagay sa blastlist ni WB country director Bert Hofman ang tatlong Filipino at apat na mga kompanya ng Tsino. Ibinahagi din nito ang bahagi ng report na nagdedetalye ng naturang katiwalian, sa Ombudsman. Nag-alok pa ito (WB) ng tulong sa gagawing imbestigasyon ng Ombudsman. HINDI DIN ITO NAAMOY NG OMBUDSMAN? Kulit… pango nga!? 

Naging bantog din ang goberno, sa pamamahala ni GMA, sa buong mundo pagdating sa KURAKUTAN, at ayon sa pagkakasunod-sunod, ito ang top ten na mga ahensiya: BIR, Bureau of Customs, Department of Public Works and Highways, Department of Environment and Natural Resources, Department of Education, National Irrigation Association, Department of Health, Department of Interior and Local Government, National Power Commission at Bureau of Immigration. 

Nga lang, walang ni isa sa mga punong bantay (salakay?) ng mga ahensiyang nabanggit ang nakurot man lang ng pinong-pino sa singit, bilang parusa. HINDI DIN ITO NAAMOY NG OMBUDSMAN? Wei... pango nga kasi!? 

Balitang-balita din sa mga barberya, tong-itstan, maging sa mga ihaw-ihaw ang mga karumaldumal na anomalya: NBN ZTE Scandal; Panunuhol sa mga Kongresista at Gobernador (October 2007); Pagnanakaw ng sagradong boto, 2004 Elections (Hello Garci); Joc Joc Bolante Case (Fertilizer Scam, P728 Million); Jose Pidal Bank Account (Unexplained Wealth, P200 Million); Nani Perez Power Plant Deal ($2 Million); Pagwaldas ng Road User's Tax para ipambili ng boto; Billion Peso Macapagal Boulevard (Overprice of P532 Million); Juetengate (Illegal Numbers game kickbacks); Tagong-yaman ni Arroyo sa Germany (Exposed by Senator Cayetano); Hello Garci Generals; Billion Peso Poll Automation contract (P1.3 Billion); Northrail Project($503 Million); Maguindanao Results of 2007 Elections (Zubiri, Bedol); NAIA-3; Venable Contract (Norberto Gonzales); Swine Scam – baboy na binaboy pa – (Exposed by Atty. Harry Roque), at iba pa. HINDI DIN ITO NAAMOY NG OMBUDSMAN? May sipon?

Si senador Mirriam ay kilalang kaalyado ni GMA. Nga lang hindi tayo sigurado kong siya’y ginagamit o siya’y sadyang nagpapagamit, sa pagsusulong na naman ng Cha-Cha. Ang Cha-Cha ay isa sa mga estratihiya upang malusutan ng mga KAWATAN (nakalipas na administrasyon) ang kanilang mga ginawang kasalanan sa bayan. 
Sakaling magtagumpay ito, 99.9 percent na ang magiging punong ministro ay si GMA kungdi man isang kaalyado o tuta nito. Kapag nangyari ito, yari na naman ang sambayanang Pilipino.

Paalala lang sa senadora, hindi Cha-Cha ang prayuridad ngayon ng bayan. Huwag sanang mailihis ang pokus ng bayan sa pagtukoy sa mga itinanim ng dating pamahalaan sa goberno (para manatili itong bulok), at ang pagpatalsik sa kanila. Sila ang mga Zombies na tinutukoy ng dating sekretaryo, Angelo Reyes, na dapat kapunin. 

Sila ang nagbigay ng bagong kahulugan sa Kataas-taasan, Kagalang-galangan, Katipunan ng mga anak ng bata (KKK). Ito na ang makabago: KONEKSYON, KUWARTA, at KAPALMOKS. 

Ika nga ni sekretari Reyes: “May mga taong kilala na ng taumbayan na mga KAWATAN pero likas na makakapal talaga ang mukha at pagala-gala pa. Ayokong matulad sa kanila, dahil ang mabuhay na walang dangal ay isang trahedya na mas masahol pa kaysa kamatayan.” 

-oOo-

Para sa komento, suhestiyon, o impormasyon: (0916)731-0183; email: kitkilatis@yahoo.com. Ang KILATIS ay matutunghayan din sa News Update. Panoorin ang KILATIS, 4:30 to 5:30, Lunes hanggang Biyernes, at PULONG-BALITAAN, 8 pm onwards, mag log on: http://www.facebook.com/l/cc08ezBaS-DYMXosb28nbPz3pLQ/www.batasmedia.com